அம்பேத்கரின் 63-வது நினைவு தினம் நாடு முழுவதும் அனுசரிப்பு! மோடி, உத்தவ் தாக்கரே மரியாதை

BR Ambedkar death anniversary : பாபா சாகிப் என பரவலாக அன்புடன் அழைக்கப்படும் B.R. அம்பேத்கர், சமூகத்தில் நிலவிய தீண்டாமை, பாகுபாடு உள்ளிட்டவற்றுக்கு எதிராகவும், பெண்களின் உரிமைக்காகவும் போராடினார்.

New Delhi/Mumbai: 

நாடு முழுவதும் இன்று அம்பேத்கரின் 63-வது நினைவு தினம் அனுசரிக்கப்பட்டது. தலித் மக்களின் அடையாளம், இந்திய அரசியலமைப்பு சட்டத்தின் சிற்பியான அவருக்கு குடியரசு தலைவர் ராம்நாத் கோவிந்த், பிரதமர் நரேந்திர மோடி, மகாராஷ்டிர முதல்வர் உத்தவ் தாக்கரே உள்ளிட்ட தலைவர்கள் மலர் தூவி மரியாதை செலுத்தினர். 

முன்னாள் பிரதமர் மன்மோகன் சிங், துணை குடியரசு தலைவர் வெங்கையா நாயுடு, காங்கிரஸ் தலைவர் ஆதிர் ரஞ்சன் சவுத்ரி, தேசியவாத காங்கிரஸ் தலைவர் சரத் பவார், அவரது மகள் சுப்ரியா சூலே உள்ளிடோரும் அம்பேத்கருக்கு மரியாதை செலுத்தினர். 

அம்பேத்கரை புகழ்ந்துள்ள பிரதமர் மோடி, அரசியலமைப்பை சுட்டிக்காட்டி அவர் 'தனித்தன்மையான பரிசை வழங்கியுள்ளார்' என்று குறிப்பிட்டுள்ளார். 

சமூக நீதிக்காக தனது வாழ்வை அர்ப்பணித்த அம்பேத்கர் பாபா சாஹேப் என்று பரவலாக அழைக்கப்படுகிறார். மகாராஷ்டிராவை சேர்ந்தவர் என்பதால் மற்ற மாநிலங்களைவிட அங்கு நினைவுதின நிகழ்ச்சிகள் அதிகம் நடந்துள்ளன.

அம்பேத்கர் நினைவுதினம் குறித்து பிரதமர் மோடி தனது ட்விட்டர் பதிவில், 'அரசியலமைப்பு சட்டம் என்ற அடிப்படையில் அம்பேத்கர் நாட்டுக்கு தனித்தன்மையான பரிசை அளித்திருக்கிறார். ஜனநாயகத்தின் அடிப்படைத் தூணே அதுதான். அவருக்கு இந்த நாடு எப்போதும் நன்றிக்கடன் பட்டிருக்கும்' என்று கூறியுள்ளார். 

அம்பேத்கரை புகழ்ந்து மோடி வீடியோ பதிவு ஒன்றையும் வெளியிட்டுள்ளார். அதில், 'நேர நிர்வாகம் மற்றும் செயலாக்கமும் நமது பணியை குறிப்பிட்ட நேரத்தில் சிறப்பாக முடிக்க உதவும். இதற்கு மிகச்சிறந்த உதாரணம் அம்பேத்கர். இந்தியாவின் மூல மந்திரமாக அம்பேத்கரை குறிப்பிடலாம்' என்று குறிப்பிட்டுள்ளார்.